Պեստիցիդներն ու ագրոքիմիկատները վնասատուների, մոլախոտերի, հիվանդությունների դեմ պայքարելու արդյունավետ միջոցներ են, որոնք նվազագույնի են հասցնում վնասատուներից և հիվանդություններից առաջացած վնասները՝ պահպանելով բերքի որակը։

Սակայն դրանց ոչ ճիշտ կիրառումը կարող է հանգեցնել այնպիսի հետևանքների, ինչպիսիք են սննդամթերքի, հողի և ջրի աղտոտումը, մարդու առողջության վնասումը։

Թունաքիմիկատների (պեստիցիդների) կիրառման ժամանակ կարևոր է պահպանել անվտանգության հիմնական կանոնները՝

1․ Անձնական պաշտպանություն՝

• կրել պաշտպանիչ հագուստ՝ ձեռնոցներ, դիմակ կամ ռեսպիրատոր, պաշտպանիչ ակնոց, երկարաթև հագուստ, փակ կոշիկներ,
• աշխատանքի ընթացքում չսնվել, չխմել, չծխել,
• աշխատանքից հետո պարտադիր լվանալ ձեռքերը, դեմքը, ցանկալի է՝ լոգանք ընդունել։

2․ Պատրաստման և կիրառման կանոններ՝

• պարտադիր կարդալ պատրաստուկի պիտակը և հետևել հրահանգներին,
• չգերազանցել նշված չափաբաժինները,
• լուծույթը պատրաստել բացօթյա կամ լավ օդափոխվող տարածքում,
• օգտագործել միայն դրա համար նախատեսված տարաներ և սարքավորումներ,
• պեստիցիդները չխառնել՝ առանց մասնագիտական ցուցումների։

3․ Կիրառման ընթացքում՝

• պահպանել անվտանգ հեռավորություն մարդկանցից, երեխաներից և կենդանիներից,
• պեստիցիդները հեռու պահել ջրային աղբյուրներից, ջրհորներից, սննդամթերքից,
• մեղուների ակտիվ ժամերին չկիրառել, որպեսզի չվնասվեն փոշոտող միջատները,
• չկիրառել ուժեղ քամու, անձրևի կամ բարձր ջերմաստիճանի պայմաններում։

4․ Պահեստավորում՝

• պեստիցիդները պահել բնօրինակ փաթեթավորմամբ՝ երեխաների և կենդանիների համար անհասանելի վայրում,
• չպահել սննդամթերքի կամ կենդանիների կերի կողքին,
• պահել չոր, զով, փակվող պահեստում,
• դատարկ տարաները չօգտագործել կենցաղային նպատակներով,
• պեստիցիդների մնացորդները չի կարելի թափել գետերի, հողի կամ կոյուղու մեջ։

5․ Թունավորման նշաններ՝

• գլխապտույտ,
• սրտխառնոց,
• շնչառության դժվարացում,
• աչքերի կամ մաշկի գրգռում:

Եթե նկատելի են նշված ախտանշանները, հարկավոր է անմիջապես դադարեցնել աշխատանքը, դուրս գալ բացօթյա տարածք և դիմել բժշկի։ Ցանկալի է բժշկին ցույց տալ նյութի պիտակը կամ ասել անվանումը։
Պեստիցիդների շրջանառության նկատմամբ հսկողությունը ոչ միայն իրավական պահանջ է, այլ նաև կենսական անհրաժեշտություն։ Պեստիցիդների ճշգրիտ կիրառումը նպաստում է անվտանգ գյուղատնտեսության զարգացմանը, հանրային առողջության պահպանմանը և շրջակա միջավայրի պաշտպանությանը։

ՏԵՂԵԿԱՆՔ - 2025 թվականին հանրապետությունում արձանագրվել է թունաքիմիկատներով թունավորման 75 դեպք, որից 8 դեպքը՝ Երևան քաղաքում, 67 դեպքը՝ մարզերում: Արձանագրված դեպքերից 1-ը՝ մահվան ելքով:
Թունաքիմիկատներով թունավորումների գերակշիռ մասը՝ 27%-ը, արձանագրվել է բնակչի անփութության, 22%-ը՝ ծնողի անուշադրության, 17%-ը՝ ինքնասպանության փորձ կատարելու, 16%-ը՝ անհատական պաշտպանության միջոցների բացակայության, 14.8%-ը՝ ոչ ճիշտ մակնշման և պահպանման հետևանքով:

ցուցադրել ամողջը