Համաձայն «Սննդամթերքի անվտանգության մասին» ՀՀ օրենքի 10-րդ հոդվածի և ԵԱՏՄ «Սննդամթերքի անվտանգության մասին» (ՄՄ ՏԿ 021/2011) Մաքսային միության տեխնիկական կանոնակարգի 10-րդ հոդվածի՝ սննդամթերքի արտադրության (պատրաստման) գործընթացի իրականացման ժամանակ, տվյալ արտադրանքի անվտանգության պահանջներից ելնելով, պատրաստողը պետք է մշակի, իրականացնի և պահպանի Վտանգի վերլուծության և հսկման կրիտիկական կետերի համակարգի (ՎՎՀԿԿ) (անգլերեն տարբերակը՝ НАССР — Hazard Analysis and Critical Control Points) սկզբունքների վրա հիմնված ընթացակարգերը՝

• սննդամթերքի արտադրության (պատրաստման) անհրաժեշտ տեխնոլոգիական գործընթացների ընտրություն,
• սննդամթերքի արտադրության (պատրաստման) ժամանակ պարենային (սննդային) հումքի աղտոտումը բացառող տեխնոլոգիական գործընթացների լավագույն հաջորդականության և հոսքայնության ընտրություն,
• տեխնոլոգիական գործընթացների և սննդամթերքի արտադրության (պատրաստման) ժամանակ հսկողության ծրագրերում սննդամթերքի վերահսկելի փուլերի սահմանում,
• անհրաժեշտ, հուսալի և համալիր հսկողություն ապահովող միջոցներով սննդամթերքի արտադրության (պատրաստման) ընթացքում օգտագործվող պարենային (սննդային) հումքի, տեխնոլոգիական միջոցների, փաթեթավորման նյութերի, արտադրատեսակի, ինչպես նաև սննդամթերքի նկատմամբ հսկողություն,
• տեխնոլոգիական սարքավորումների սարքինության նկատմամբ հսկողություն,
• տեխնոլոգիական գործընթացների վերահսկելի փուլերի և սննդամթերքի նկատմամբ իրականացված հսկողության արդյունքների մասին տեղեկատվության փաստաթղթավորման ապահովում,
• սննդամթերքի պահպանման և տեղափոխման (փոխադրման) պայմանների ապահովում,
• սննդամթերքի արտադրության (պատրաստման) գործընթացում օգտագործվող արտադրամասերի, տեխնոլոգիական սարքավորումների և գույքի պահպանում սննդամթերքի աղտոտումը բացառող պայմաններում,
• աշխատակիցների կողմից անձնական հիգիենայի ձևերի ընտրություն և կանոնների պահպանում,
• սննդամթերքի անվտանգությունն ապահովող միջոցների ընտրություն, սննդամթերքի արտադրությունում (պատրաստման ժամանակ) օգտագործվող արտադրամասերի, տեխնոլոգիական սարքավորումների և գույքի մաքրման, լվացման, ախտահանման, վարակազերծման պարբերականության և հոսքայնության սահմանում,
• արտադրված սննդամթերքի համար ներկայացվող պահանջներին համապատասխանությունը հավաստող փաստաթղթերի վարման ու թղթային տարբերակով և/կամ էլեկտրոնային կրիչով դրանց պահպանման ապահովում,
• սննդամթերքի քանակի հետագծելիության ապահովում։

Վերոնշյալ պահանջները ներառված են Տեսչական մարմնի կողմից մշակված ստուգաթերթերում:

ԵԱՏՄ «Սննդամթերքի անվտանգության մասին» (ՄՄ ՏԿ 021/2011) տեխնիկական կանոնակարգի 10-ից 17-րդ հոդվածներն արտացոլում են նախապայմանային ծրագրերը (պատշաճ հիգիենիկ, պատշաճ արտադրական պրակտիկա) և HACCP համակարգի սկզբունքների վրա հիմնված ընթացակարգերի պահանջները, որոնցով ապահովվում է 10-րդ հոդվածի պահանջի կատարումը։